செவ்வாய், ஜனவரி 14 || தெளிதேன் துளிகள்

வாசிக்க: உபாகமம் 10: 12,13

தேவனுடனான உறவை சரிசெய்துகொள்ளுங்கள்!

.. உங்கள் முழு இருதயத்தோடும் என்னிடத்தில் திரும்புங்கள்... உங்கள் இருதயங்களைக் கிழித்து... திரும்புங்கள்...     (யோவேல் 2:12,13)

நமது உறவுநிலைகள் எல்லாம் சரியாகத்தான் இருக்கின்றனவா என்று அவ்வப்போது சோதித்துக்கொள்ளவேண்டியவர்களாக நாம் இருக்கிறோம். ஏதாவது தவறாக இருப்பின் சரிசெய்யப்படவேண்டும். நாம் தேவனோடு கொண்டுள்ள பரிசுத்த உறவுநிலைக்கும் இது பொருந்தும். இயேசுவை என்று நாம் சொந்த இரட்சகராக  ஏற்றுக்கொண்டோமோ அன்றே கர்த்தரோடு நமக்கு பிதா‡பிள்ளை உறவு ஏற்படுகிறது. அவரது நாமம் நமக்கு சூட்டப்படுகிறது. அவர் நம் குடும்பத்தின் தலைவராக, தேவைகளைச் சந்திப்பவராக, பாதுகாப்பவராக, சுகப்படுத்துபவராக, போதிப்பவராக, உற்சாகப்படுத்துபவராக, விடுவிப்பவராக, மீட்பராக மாறிவிடுகிறார். இந்த உறவினைத் தக்கவைத்துக்கொள்ள நாம் என்ன செய்கிறோம்? அவர்மேலுள்ள நமது அன்பும் அர்ப்பணிப்பும் நாட்பட நாட்பட குறைந்துபோகிறதா, அதிகரிக்கிறதா?

இதை அறிந்துகொள்ள நம்மை நாமே சில கேள்விகள் கேட்டுக்கொண்டு, அதற்கு உண்மையான பதில் கொடுக்கவும் வேண்டும்.

1. கர்த்தர் எனக்குக் கொடுத்திருப்பவைகளை நான் எப்படிப் பயன்படுத்துகிறேன்?

2. கர்த்தரை தேவையில்லாமல் குற்றப்படுத்துகிறேனா?

3. கர்த்தர் கொடுத்த கிருபை மற்றும் வரங்களை நான் உதாசீனப்படுத்துகிறேனா? 4. வேதவார்த்தையின் மூலம் அவர் தந்த நல் ஆலோசனைகளைத் தள்ளிவிட்டேனா அல்லது ஏற்றுக்கொண்டேனா?

5. அவரிடமிருந்து பெற்றுக்கொண்ட காரியங்களுக்காக நன்றி செலுத்துகிறேனா?

6. அவரது வாக்குத்தத்தங்களை நம்பி அவற்றை சொந்தமாக்குகிறேனா? அல்லது சந்தேகப்படுகிறேனா?

7. வேதத்தை வாசிப்பதில் ஆர்வம் காட்டுகிறேனா?

8. அவரோடு பேசுவதற்கு, ஜெபிப்பதற்கு ‡ எனக்கு ஆவல் உண்டா?

 அன்பானவர்களே, இந்தக் கேள்விகளை நாம் கேட்டுக்கொண்டு, குறைவாயிருக்கும் பகுதிகளை சரிசெய்துகொண்டு, அவருடனான உறவைப் பலப்படுத்திக்கொள்ளவேண்டும். இல்லாவிட்டால் அவரோடுள்ள உறவு சீர்குலைந்து, நம் வாழ்வில் முற்றிலும் அதை இழந்துவிடும் பரிதாப சூழலுக்கும் தள்ளப்படுவோம். கவனமாயிருப்போம்.

ஜெபம்: தேவனே, உம்மோடுள்ள உறவினின்று நான் விலகி, உம்மைப் புறக்கணித்தேன். தயவாக என்னை மன்னியும். இயேசுவின்மூலம் நீர் அருளிய இரட்சிப்பு, இவ்வுலக ஆசீர்வாதங்கள், மற்றும் வரங்கள், சமாதானத்திற்காக நன்றியுடனிருந்து, நமது உறவைக் காத்துக்கொள்ள கிருபை தாரும்.  ஆமென். 

தெளிதேன் துளிகள்

---

Our Contact:

EL-SHADDAI LITERATURE MINISTRIES TRUST, CHENNAI - 59.

Office: +91 9444456177 || https://www.honeydropsonline.com